संविधानापुढे अतिनम्र-लाचार
अन् आगलाव्यांना पद्मपुरस्कार
शासनाचा हा दुटप्पी व्यवहार
निषेधार्हच!
खूनी-मारेकरी आणि दंगेखोर
जे जे लोकशाहीला ठोकरणार
तयांचा ठरवून करणार सत्कार
मुद्दामहून!
कलंकित घुसडती शंभरात चार
शरमेने झुकल्या माना मान्यवर
अवघाच संघपरिवार मग होणार
आता शुद्ध!
प्रजासत्ताकाची रया घालविती
उन्मादखोरीला प्रोत्साहन देती
दयाक्षमाशांतीला मिळे मूठमाती
नमोराज्यात!
देशबुडव्यांसाठी काळ सुखाचा
खर्या देशभक्तांच्या छळाचा
प्रतिक्रांतीला प्रबळ करण्याचा
हाच तो काळ!
राज्यघटनेच्या गाभ्यावर हल्ले
उपेक्षितांचे अधिकार डावलले
दशकभरापासून असेच चालले
बिनबोभाट!
घटनेतली न्याय-समता-बंधूता
प्रतिगाम्यांच्या पचनी न पडता
मनुस्मृतीखोरांची मानसिकता
उघड होते!
डोळ्यात खुपे सर्वसमावेशकता
वर्चस्ववाद्यांची उबळते विषमता
एकाच रंगात रंगविण्याचा कित्ता
गिरविती
संवैधानिक पदांचे रबरी शिक्के
गुलाम बनवले सर्व हुकुमी एक्के
लोकशाहीत हुकूमशाहीचे धक्के
खात राहू या!
ऐसा मोदीशाचा एकूण कारभार
खुशमस्कर्यांनी सजला दरबार
सर्वसामान्यांना दिल्लीच्या पार
हाकलले गा!
