🚩
संतांच्या पंक्तीत फडतूसांना बसवले
समतेच्या वारीत सनातनी घूसवले
पादुका उत्सवाने समाजमन नासवले,
महाराष्ट्री!
काय वर्णावी ती संतांची महत्ता
वारकरी धर्म गातो समतेची गाथा
भटी खोड जुनी,जोडी नवनव्या कथा,
काल्पनिक!
ठेवियले काजवे सुर्याशेजारी
थोतांडे अवडंबर माजले देव्हारी
अंधश्रद्ध अंधभक्तांची ही शिरजोरी
चाललेली!
तांब्या-पितळेला सोन्याची कल्हई
लायकी नसलेले जमवले जातभाई
मतीमंद,चिलिमफुके यांची सरबराई
निलाजरी!
रेवड्यांप्रमाणे वाटती आता संतपदे
लोचट मिडियाचे आप्तभिमुख धंदे
परंपरेच्या नावाखाली नवे नवे फंदे
वैदिकांचे!
संतप्रभावळीत त्यांना देऊनी स्थान
भाकडकथा घुसडती,रचती पुराण
नवे संत नवे भक्त नवीन देवस्थान
भविष्यात!
पादुकादर्शनाचा जाणुनबुजून फंडा
थोरामोठ्यांबरोबर सुमारांचा तांडा
पिढ्यानपिढ्या हा हिणकस अजेंडा,
राबविती!
गर्भसंस्काराचे मागे चालले दुकान
भ्रमप्रसाराचे वेळी होते हरवले भान
प्रबोधन नाही,उलट लोकांचे शोषण
केले होते!
भेसळभक्तीची वाजविती तुतारी
नाना संप्रदायांची मांडली दुकानदारी
पिळवणुकीची पुन्हा जय्यत तयारी
झाली सुरु!
चार खांबांवर उभा धर्म वारकरी
महाराष्ट्रधर्म आज हाच खरोखरी
तोच भ्रष्ट करण्याची घेतली सुपारी,
फितुरांनी!
🚩 -भरत यादव
Bharat Yadav
